Bakıda Gömrük-Biznes Forumu keçirilib

Dövlət Gömrük Komitəsinin, Azərbaycan Respublikası Sahibkarlar Təşkilatı Milli Konfederasiyasının təşkilatçılığı və BP şirkətinin dəstəyi ilə “Gömrük-Biznes Forumu 2024” keçirilib.

Forumda dövlət və özəl sektorun, ictimaiyyətin, gömrük işinin təşkili sahəsində ixtisaslaşan elm adamları, ekspertlər və media təmsilçilərindən ibarət nümayəndələr iştirak edib.

Tədbirin açılış mərasimində Azərbaycan Prezidentinin köməkçisi, Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov, Dövlət Gömrük Komitəsinin sədri Şahin Bağırov, əmək və əhalinin sosial müdafiəsi naziri Sahil Babayev Milli Məclisinin İqtisadi siyasət, sənaye və sahibkarlıq Komitəsinin sədri Azər Əmiraslanov, İqtisadiyyat Nazirliyi yanında Kiçik və Orta biznesin İnkişafı Agentliyinin İdarə Heyətinin sədri Orxan Məmmədov, Sahibkarlar Təşkilatı Milli Konfederasiyasının prezidenti Məmməd Musayev çıxış ediblər.

Daha sonra Dövlət Gömrük Komitəsinin mütəxəssisləri tərəfindən hazırlanan, 2025-ci ildən etibarən tətbiqinə başlanacaq gömrük dəyərini qabaqcıl beynəlxalq təcrübə əsasında dəqiq və dürüst, rəqəmsal həllər əsasında müəyyənləşdirən “Rəqəmsal Gömrük Dəyəri”, saxlanc xərclərini azaldılmasına, malların istehlakçıya daha sürətli şəkildə çatdırılmasına, biznes proseslərin çevikliyinin artırılmasına şərait yaradacaq “İkipilləli Buraxılış Sistemi” və daşıyıcılar üçün resursların daha rasional bölüşdürülməsi, sərhədkeçmə və rəsmiləşdirilmə proseslərinin sürətləndirilməsi, logistika işinin səmərəli təşkili və proqnozlaşdırılması baxımından əhəmiyyətli olan “İlkin Məlumatlandırma Sistemi” layihələrinin təqdimatı keçirilib.

Qeyd edək ki, rəqəmsal həllərə və beynəlxalq dəyərləndirmə standartlarına, süni intellektə və elmi araşdırmalara əsaslanan yeni layihələr əlverişli biznes mühitinin formalaşdırılması, vaxt və vəsaitə qənaət olunması, gömrük işinin səmərəliliyinin artırılması baxımından xarici ticarət iştirakçılarına əlavə imkanlar yaradacaq.

Daha sonra Səlahiyyəti İqtisadi Operator layihəsi çərçivəsində SİO statusu alan “Bakı Beynəlxalq Dəniz Ticarət Limanı” QSC-yə və “FoodCity Aqrokompleks”ə sertifikatlar təqdim olunub.

Forum öz işini panel müzakirə ilə davam etdirib və sahibkarları maraqlandıran suallar cavablandırılıb.

Bu ilin yanvarında istifadəyə verilmiş Dövlət Gömrük Komitəsinin Avtomatlaşdırılmış Risk Analizi Sisteminin (ARAS) tətbiqindən sonra orta sərhədkeçmə müddəti 58 %, fiziki yoxlamalar 20 %, rəsmiləşdirmə müddəti isə 15 % azalıb.

Komitənin sədri Şahin Bağırov Bakıda keçirilən Gömrük-Biznes Forumunda bildirib.

"Ötən il təqdim edilmiş ARAS-la bir sıra alətlərin tətbiqində yeni nailiyyətlər əldə olunub. Gömrük qanunvericiliyinə əməl edən xarici ticarət iştirakçıları üçün əlverişli biznes mühiti yaratmaq məqsədilə gömrük rəsmilləşdirilməsi üçün sərf olunan müddət azalır, göndərişlər üzrə xərclərin minimalaşdırılmasına nail olunur", - deyə Ş. Bağırov vurğulayıb.

Azadpress.az